Ang Republic Act No.9372 o mas kilala bilang Human Security Act ay isang sa mga pinakabagong batas na ipinatupad ng Pangulong Gloria Macapagal Arroyo. Ito rin ay tinatawag na Anti-Terrorism Bill. Pinirmahan ito ni Pangulong Arroyo noong ika-anim ng Marso 2007.

Ano nga ba Human Security Act at ano ang mga layunin sa pagtatapud nito? “It is declared a policy of the State to protect life, liberty, and property from acts of terrorism, to condemn terrorism as inimical and dangerous to the national security of the country and to the welfare of the people, and to make terrorism a crime against the Filipino people, against humanity, and against the law of nations.” Ang pagligtas sa pamahalaan at bayan, at ang pagtanggol ng mga tao sa mga gawaing terrorismo ang sinasabing mga pangunahing layunin ng pagpapatupad Human Security Act.

Bakit naging isang kontrobersiyal na isyu ang pagpapatupad ng batas na ito? Bakit tila marami ang laban o hindi sang-ayon sa batas na ito? Makatarungan nga ba ito? Ang mga ito ay ilan lamang sa mga katanungan ukol sa Human Security Act.

Ayon sa nakararami, malabo at masyadong masklaw ang depinisyon ng terorismo. Sa ikatlong seksyon ng batas, ang terorismo ay isang gawa o akto ng paghasik at paglikha ng kundisyon o anu mang pangyayari na maaring magbigay ng kakaibang takot at pangamba sa populasyon upang pwersahin ang gobyerno. Ayon pa sa ikatlong seksyon ng batas, ang isang akto ay masasabing may kaugnayan sa terorismo kung ito ay “...thereby sowing and creating a condition of widespread and extraordinary fear and panic among the populace, in order to coerce the government to give in to an unlawful demand shall be guilty of the crime of terrorism and shall suffer the penalty of forty (40) years of imprisonment, without the benefit of parole...” Ano nga ba ang ibig sabihin nila ng “unlawful demand”? Hindi nabigyan ng malawak na depinisyon ang iba’t ibang termino na ginamit sa Human Security Act. Malabo at hindi partikular ang kahulugan ng terorismo kung kaya’t marami ang puwede maging implikasyon nito. Gayunpadin, hindi malinaw ang batas na ito.

Ang mga aktong kriminal na maituturing bilang isang aktong terorismo ayon sa depinisyon nito ay ang pagrerebelde sa mga batas, pagsabak sa kudeta, pagpatay, pamimirata, pangingidnap, paninira ng mga ari-arian, mga krimen na may kaugnay sa destruksyon o anumang pagsira at marami pang iba. Ayon pa sa batas, ang mga mahuhusgahang nagkasala ay makukulong ng apatnapung taon nang walang pagkakataong makapag-parole.

Anu-ano nga ba ang mga pangunahing probisyon ng HSA? Ang mga pangunahing probisyon ng HSA ay ang pagsagawa ng paniniktik o surbeylans laban sa mga organisasyon na sinasabing suspek sa "terorismo", ang walang taning na detensyon at pagdakip nang walang mandamyento, ang pagpapailalim ng isang "suspek" sa "house arrest", at ang pagkontrol sa mga deposito at rekord sa banko.

Ayon sa ikalimampu’t tatlo at ikalimampu’t apat na seksyon ng batas, pangangasiwaan ng Anti-Terrorism Council (ATC) ang pagpapatupad ng HSA sa ilalim ng pangkalahatang pamumuno ng Executive Secretary.

Malaki ang magiging epekto ng batas na ito sa kalagayan ng karapantang-tao sa bansa. Maari itong maging taliwas sa mga karapatang-tao o mga pandaigdigang makataong batas. Ang Human Security Act ay taliwas rin sa diwa ng demokrasya. Ayon pa sa batas na ito, kahit sa simpleng pagsususpetsa pa lamang bilang isang “terorista” ay mapapatawan na ng kaparusahan at restriksyon sa mga karapatan ang isang mamayan.

Bukod pa rito, sa pamamagitan rin ng pagpapatupad ng batas na nito, mapaiiral rin ang di deklaradong batas militar. Maari nitong bigyan ng malawak na kapangyarihan ang pamahalaan o estado na gamitin ang mga instrumento tulad ng militar, pulisya, mga korte at kulungan upang maghasik ng mas masahol, malawakan at terorismo na laban mismo sa mamamayan. Magiging mas makapangyarihan ang estado o pamahalaan dahil sa pagpapatupad ng batas na ito.

Sa pagpapatupad ng Human Security Act, siguradong malaki ang pakinabang ng Pangulong Arroyo. Magamit ng pamahalaan ang Human Security Act upang ituring na krimen ang anumang pagrerebelde ng mga tao at ipagkakait nito sa sambayanan ang karapatang ipagtanggol ang sarili laban sa gobyerno. Maari na ring bansagang at sabihing "terorismo" ang pagkilos at panawagan para magbitiw o patalsikin si pangulong Arroyo sa kanyang puwesto kung kaya’t ang paggawa nito ay labag sa batas ayon sa HSA. Magagamit rin ito ng pangulo sa pagsusulong sa tinatawag na ChaCha o Charter Change ng pangulo. Higit pa riyan, magagamit rin ang HSA at ang "gera kontra terorismo" upang mabigyan ng katwiran ang tuluy-tuloy na pagpapakat ng mga tropang Amerikano sa Pilipinas. Gayunpaman, ang Human Security Act ay nagsisilbi ring isang malaking hadlang sa usapang kapayapaan.

Sa kabuuan, dahil sa mga iba’t ibang dahilan tulad lamang ng pagpapawalang bahala ng mga karapatang pantao, marami ang hindi sumasang-ayon sa pagpapatupad ng batas na ito.

Gurrea, Fern Ives